Bertanna Simonsd. Rake

Etterslekt for personar fødde på Sjurebruket 5. Marsåslekta

5.5 Bertanna Simonsdtr. Rake (1903)

Anders Lunde (1895) hadde drive med ymse arbeid. Etter at han vart gift med Bertanna Rake, tok dei over garden på Marså og fekk skøyte i 1929. På Marså var det mykje skog og lite dyrka jord. Anders tok no til å dyrke opp meir jord, og han planta mykje av jorda til med frukttre. Marså ligg fint til og høver for fruktdyrking. Dei har bygt nytt våningshus på garden i si tid. Anders har vore presten sin medhjelpar i Lokyrkja i mange år. Dei har 3 born: Jens, Sverre og Åge.

Jens Anderson Lunde (1927) har gått Firda Gymnas, og utdana seg til ingeniør i Gøteborg. Han er bygningsingeniør med eige firma: Lunde Bygningsingeniør-byrå, Akersberga ved Stockholm.Han er gift med Ragnhild Ingeborg Marie Sahlen (1930). Ho er kartteiknar. Dei har 2 born: Bjarne (1961) og Christer (1964).

Sverre Andersson Lunde (1929) har overteke Marså, og fekk skøyte i 1968. Han har utdana seg til målar, og driv det som yrke saman med gardsbruket.

Åge Andersson Lunde (1939) har gått framhaldsskule og Nordfjord Folkehøgskule. No arbeider han som rørleggjar i Stryn.