Sigurd Nesdal

Diverse artiklar 5. Sigurd Nesdal til minne

(Fjordingen 15. november 2002, død 12. november 2002)

Totalisten, norskdomsmannen og humoristen Sigurd Nesdal er død, 87 år gamal.

Han vart fødd på garden Frøholm, ved Innvik i Nordfjord. Han var vegarbeidar i mange år før han flytte til Oslo og fekk seg teknisk utdanning. Ei tid var han i Geografisk oppmåling før han byrja i Noregs Vassdrags og Elektrisitetsvesen. Der var han resten av sitt yrkesaktive liv, og i mange år redaktør av bladet Fossekallen.

Men det var som programlagar, kåsør og underhaldar han var mest kjent. Alt etter dei første åra til fjernsynet var han nærast blitt ein veteran med program som "Då Valdresvassdraget rann ut ved Moss", "Lodalen - fager og fårleg" (som seinare og vart bok) og "Dei vart amatørar". I radioen har han i tillegg til å vere morgonkåsør i " Som dagane går" hatt mange kåseri med stor spennvidde i emneval. "Lopper og lus i liv og litteraturen", " Jaktlag eller slaktarlag" og "Eldvatn og narkotika" . er døme på dette. Mange av programma har vore i tilknyting til folkedans og folkedansmiljøet i Oslo, der han sjølv var aktiv i meir enn femti år i Nordfjordlaget.

I dei seinare åra var han mykje nytta som historieforteljar. Det særmerkte er at han dikta om historiene til rim. Gjennombrotet kom med eit innslag i programposten til Dag Frøland og Tore Ryen, "Har du lyst har du lov". Seinare vart det plate, og versa vart gitt ut som hefte. Han har og vore gjest i 'Du skal høre mye" frå NRK Tromsø.

Det var visse emne han meinte var for alvorlege til å ha moro med. Dei tragediane som følgjer av alkoholbruk skulle ein ikkje vitse vekk i '"full mann" -sketsjar. Og han var oppteken av den plaginga menneske med skavankar har vore utsette for lenge før "mobbing" vart eit moteord.

Etter at han vart pensjonist har han reist land og strand rundt som underhaldar, både som folkedansar, kåsør og historieforteljar. No har han lagt inn årene for godt, og ein merkesmann er borte. Men merket og minnet vil stå att.

Arild Nesdal