Aslaug Andreasdotter Underthun

Garden og ætta. Sjurebruket i Loen 11. Unge kona og slekta hennar

I 1930 gifte ho Olina seg med Karl Markusson Loen (fødd 18.5.1901) og fløtte ut og vart husmor på Markusbruket. I 1932 gifte Olav seg med Aslaug Andreasdotter Undertun, frå Gulen i Sogn. Det var den første kona på Sjurebruket som vi veit om som ikkje var fødd eller oppvaksa i Stryn eller Innvik komune.

11.1. Slekta på Undertun.

Undertun ligg i Eivindvik som er sæte for komuneadministrasjonen i Gulen, der bur prest og dokter og lensmann. På Undertun har dei no bygt den nye barne- og ungdomsskulen. I 1966 fekk dei vegsamband med riksvegnettet i landet. Iver Kleiva har skrive bygdeboka "Gulen i gamal og ny tid". Der skriv han om Undertun i bind 1 side 383 og om Aslaug si slekt side 393-395.

Undertun er ein gard som er oppteken i nyare tid. Den første som ein høyrer om som legg skatt var ein Oluf i 1612-13 som betalar 5 kanner malt, og det kan godt vere at det er første brukaren på Undertun. Aslaug slektar ikkje til han, for slekta hennar har berre i fire generasjonar butt på Undertun. Den første, Lars Bertelson, kom frå Hantveit i 1863.