Karl Johan Øyvin Markussen Loen

Etterslekt for personar fødde på Sjurebruket 16. Markusslekta

Fig. Slektskapet med Sjurebruket

16.1 Markusbruket (gnr 70, bnr 2 I Loen)

Markusbruket er det yngste av dei 14 bruka i Loen. Det var i 1773 at dette bruket vart skilt frå bruk nr 1, Erkebruket. Den første brukaren på det fråskilde bruket var Simon Jacobson, og han var gift med Anne Salvesdotter Sande. Dei hadde ikkje søner som overtok bruket, men dottera Brite Simonsdotter, tok over bruket og gifte seg med Markus Anderson Hatleim. Etter han er det bruket har fått namn. Soneson hans som og heitte Markus, var det som løyste inn bruket og fekk kongsskøyte i 1844. Bruket vart innløyst for 200 spd. Dette bruket hadde tidlegare vore kyrkjegods. Sonen Anders fekk skøyte i 1857. Han var i alt gift 4 gonger. Han Anders var ein svært tiltaksam mann. I 1868 kom fylkesbåten til Loen, og Anders vart tilsett som ekspeditør for fylkesbåtane. Samstundes tok han til med ein liten landhandel. Han tok og i 70 åra til å ta mot reisande i nystova, og i 1884 gjorde han første opptaket til det som no er Hotel Alexandra.

Sonen hans, Markus, reiste tidleg til Amerika, og var der i ca. 10 år. Då han kom heim, overtok han garden og hotellet. Han heldt fram som ekspeditør for fylkesbåtane, og han var styrar både for telefon og post i Loen. Det var stor framgang på hotellet og mange utvidingar i han styringstid. Han hadde 9 born, og då Markus døde vart Hotel Alexandra skipa til aktieselskap for borna til Markus Loen. Dette har i mange år vore eit av dei aller største turisthotella i landet. Garden vart skild frå hotellet, og sonen Karl Markusson tok over garden. Då han gifte seg med Olina Andreasdotter Loen, kom Sjureslekta saman med Markusslekta.