Lars Eliasson Rake

Etterslekt for personar fødde på Sjurebruket 4.1 . Framigardsbruket

Lars Arentson Rake (1854 - 1883)

I 1869 - 70 var det utskiftning på heimebøen på Rake, og dei fleste vart då fløtte ut or det gamle tunet. Framigard vart då sitjande igjen i det gamle tunet. Lars fekk eit stort arbeid med å dyrke opp og rydje dei gamle tuftene til dei som fløtte bort. Skøyte fekk han i 1877. Det var berre 6 år han styrde bruket, for han fekk lungebetennelse og døde i 1883. Året etter er det ein ny Lars som er brukar på garden, med di enkja Malene Lassedtr. Opheim (1851 - 1903) gifter seg med Lars Rasmusson Ytre- Eide (1846 - 1934). Enkjer var gjvaste gifte gutane kunne få når dei ikkje sjøl hadde gard. Enkja tok mot tilbodet med glede også av praktiske grunnar. Det var ikkje godt å styre med ein gard utan å ha ein mann som tok dei tyngste taka. Difor ser vi i gamle kjelder at kvinnene var sjeldan noko serleg meir enn eitt år i sitt enkjestand. I første ekteskapet med Malene og Lars Arentson var desse borna: Malene, Rakel, Arent og Lisabet. I andre ekteskapet hadde Malene og Lars Rasmusson desse borna: Rasmus, Ludvig og Lovise.

Då broren Arent døde ung, var det den yngste dottera som tok over farsgarden. Dei andre søstrene, Malene og Rakel, for tidleg til Amerika. Borna i det andre ekteskapet, Rasmus, Ludvig og Lovise reiste alle til Amerika. Rasmus var ugift, han kom heim og budde i lang tid med Malene og Rangvald Oppheim. Han bur no på Heimen i Stryn.