Andreas Olsen Loen

Etterslekt for personar fødde på Sjurebruket 3. Sjurebruket frå 1800 og fram til i dag

Fig. Slektsgreiner

I dette kapittelet er det fortalt om slekta på Sjurebruket. I eigne kapittel er det fortalt om slektene til dei som fløtte ut.

3.1 Anders Olsen Loen (1814-1883)

Anders var gift med Olina Arentsdotter (1819-1886). Ho var frå Framigardsbruket på Rake, og det var søskenbyte slik at Malene, søster til Anders, vart gift til Rake med Arent bror til Olina. Når det var slike søskenbyte så er det vel mest truleg at foreldra hadde noko med saka å gjere, og det var kanskje ikkje kjærleiken mellom dei to som fekk mest å seie.

Men vi har ikkje høyrt noko anna enn at det gjekk godt med samarbeidet på Sjurebruket. Han Anders fekk skøyte i 1846, og han gjekk opp i det daglege arbeidet. Han hadde stor slåtteteigane i utmarka. Han Ola, son hans, fortalde at han såg lite etter å rydje bort runnar som vaks opp på heimebøen, men han passa på å rydde bort kvar ein kvist i skogaslåtten. Vi veit ikkje så svært mykje om han Anders og ho Olina. Det var vel ofte eit tungt slit for dei som for andre vestlandsbønder den gongen. Dei hadde 5 born: Jannike, Ola, Arent, Lars og Rasmus.

Jannike var elst. Ho vart gift med med Ola på Antunsbruket i Loen (Sjå om henne under Antunsslekta i Loen).

Ola vart brukar på Sjurebruket.

Arent og Rasmus reiste til Amerika (sjå under Sjureslekta Amerika. Del 1). Rasmus var spelemann då han var heime. Lars døydde då han så vidt var vaksen.

Fig. Anders sine etterkomarar