Marså

Bygdesoga for Innvik og Stryn. Gardane 83 Marså

Om nokre av brukarane

I 1782 selde Marså-mannen jektenaut-tuft til Lasse Bø og Stranda-karane for 2 rdl. Den første brukaren ein høyrer om, var Oluf. Dottera hans, Elina, fekk ein låk lagnad. Ho fekk barn med Ivar R. Flo, som var gift med frenden hennar. Elina drap barnet og vart dømd frå livet og avretta i Bergen 1630. Ivar slapp med ei bot på 30 rdl.

Jens Pederson Krabbe var brukar her ikring 1700. Han var sersjant i Bergenhus regiment og hadde vore med i Gyldenløvefeiden. Han var vel son til Peder Jensson Rake, og i så fall soneson til presten Jens Støfrenson, kapellan i Innvik, d. f. 1636, og kona Susanne. Brite Jensd. Krabbe var trulova med Botolv Simonson, men då han slo opp med henne, gjorde dei i 1717 den semja at ho skulle ha avlen av ein åker, for til ei ku og husvære hjå han. Han var då trulova.

Dei to Marså-mennene Paul Samuelson og Peder Andersson kollsigla i ein stormiling på Oldefjorden vinteren 1807, men vart heppeleg berga av Sjur Vinsrygg, Tore Bø og Ola Jonstad. To kvinnfolk som var med kom bort. Dei to mennene var så medtekne at dei var frå sans og samling.